Дзмiтрый — наш герой! | Заря над Бугом
Дзмiтрый — наш герой!

Дзмiтрый — наш герой!

Так склалася, што сярод выпускнікоў нашай установы адукацыі, а гэта сярэдняя школа вёскі Тамашоўка,  многа знакамітых людзей. Усе яны ўжо людзі сталыя, унёсшыя вялікі ўклад у развіццё краіны, сваёй малой радзімы, школы. На  прыкладзе іх жыцця і дзейнасці мы імкнемся выхоўваць нашых цяперашніх вучняў і, канешне, спадзяёмся, што кожны з іх вырасце сумленным, адказным, добра выхаваным грамадзянінам і проста годным чалавекам.

Пацверджаннем гэтаму з’яўляецца ўчынак нашага былога вучня Дзмітрыя Страчука. У красавіку мінулага года школу, ды і ўсю вёску, ускалыхнула вестка: наш Дзіма здзейсніў подзвіг…

Тое, што калі прыйшоў час тэрміновай службы і Дзіма трапіў у дэсантныя войскі, ведалі многія і адзначалі: на такую службу трапляюць лепшыя з навабранцаў.

Тэрміновую службу Дзіма праходзіў у  38-й асобнай гвардзейскай дэсантна-штурмавой брыгадзе. Пятага красавіка на вучэннях у Шумілінскім раёне Дзмітрый Страчук і Яўген Жарскі выконвалі чарговы скачок з парашутам. На вышыні каля 80 метраў у выніку рэзкага  парыву ветру адбылося сыходжанне двух парашутыстаў. У Яўгена купал згас. Дзмітрый дакладнымі і ўпэўненымі дзеяннямі, зафіксаваўшы рукамі  шаўковае палотнішча, утрымліваў  яго аж да самага прызямлення. Дзякуючы зладжаным дзеянням гвардзейцаў удалось пазбегнуць трагедыі.

А інакш, напэўна, і быць не магло. Яшчэ будучы вучнем у школе, Дзіма заўсёды вылучаўся сур’ёзнасцю, адказнасцю і нейкім асаблівым пачуццём сяброўства. Мне як класнаму кіраўніку Дзімы часта здавалася, што пэўную частку адказнасці за сяброў юнак бярэ на сябе.

 Сёння, гаворачы пра Дзіму, трэба адзначыць, што ўжо ў школьныя гады хлопец вылучаўся любоўю да сельскай гаспадаркі. Быў першым памочнікам маме ў дамашняй гаспадарцы. Пагэтаму, калі Дзмітрый звольніўся ў запас, ён нядоўга адпачываў. Зараз малады чалавек добрасумленна працуе трактарыстам у ААТ “Камароўка” і карыстаецца павагай  у кіраўніцтва і калег.

Асаблівыя словы падзякі хочацца выказаць бацькам героя — Наталлі Міхайлаўне  і Уладзіміру Аляксандравічу. За выхаванне сына, за той цесны кантакт са школай, які на працягу ўсёй вучобы падтрымлівала Наталля Міхайлаўна. Бо толькі ў цесным тандэме “сям’я – школа” мы можам выхаваць адказную асобу і сумленнага чалавека.

11 студзеня на плацу 38-й асобнай гвардзейскай дэсантна-штурмавой брыгады міністр абароны РБ Андрэй Раўкоў уручыў медалі “За адвагу” гвардыі радавым запаса Дзмітрыю Страчуку і Яўгену Жарскаму.

Мы ганарымся табой, Дзімачка!  Ты — наш герой!

Таццяна ПАРХАЦ,

намеснік дырэктара па вучэбнай рабоце ДУА “СШ в. Тамашоўка”

Похожие новости

Create Account



Log In Your Account



Заказать звонок
+
Жду звонка!