ГАЛОЎНЫЯ СІМВАЛЫ НАШАЙ СУВЕРЭННАСЦІ | Заря над Бугом

ГАЛОЎНЫЯ СІМВАЛЫ НАШАЙ СУВЕРЭННАСЦІ

Надзвычай насычанымі на ўрачыстыя падзеі апынуліся мінулыя выхадныя для нас, беларусаў. У суботу святочным салютам адгрымелі грандыёзныя мерапрыемствы, прысвечаныя 70-годдзю Вялікай Перамогі савецкага народа ў Вялікай Айчыннай вайне, а ўжо 10 мая, у другую нядзелю месяца, у краіне адзначаўся Дзень Дзяржаўнага герба і Дзяржаўнага сцяга Рэспублікі Беларусь. Менавіта гэтыя атрыбуты дзяржаўнасці зяўляюцца для нас арыенцірам у сусветнай прасторы, надаюць сілу ў дасягненні пастаўленных мэтаў, непарыўна звязаны с пачуццём нацыянальнай годнасці

Свята, прымеркаванае ушанаванню галоўных сімвалаў краіны, прайшло і ў Прыбужжы. Месцам правядзення ўрачыстасці стала пляцоўка перад раённым Домам культуры. У мерапрыемстве прынялі ўдзел прадстаўнікі мясцовай улады на чале са старшынёй райвыканкама Уладзімірам Мацукай. Кіраўнік раёна павіншаваў усіх са святам і звярнуўся з прамовай да прысутных, у першую чаргу моладзі, ад якой залежыць будучы стан нашай Айчыны:

“Для сапраўднага грамадзяніна няма нічога святлей і даражэй за герб і сцяг роднай краіны. Гледзячы на іх, кожны з нас адчувае сябе часткай адзінай вялікай сям’і, імя якой – беларускі народ. Нашы герб і сцяг адлюстравалі веліч і хараство роднай зямлі, пераемнасць гістарычных традыцый, непарыўнасць сувязей мінулага, сучаснага і будучага краіны, мірны, стваральны характар беларусаў”.

Пад эгідай галоўных сімвалаў суверэннай дзяржавы беларускі народ ўпэўненна ідзе да агульнай мэты – пабудовы моцнай і квітнеючай Беларусі, паўсядзённай працай і свабоднай воляй стварае краіну, якой кожны з нас можа ганарыцца. Уладзімір Аляксандравіч звярнуў увагу на тое, што жыхары нашага раёна з’яўляюцца  актыўнымі ўдзельнікамі гэтага будаўніцтва. Прыбужжа займае пятае месца ў рэспубліцы па паказчыках сацыяльна-эканамічнага развіцця, працаўнікі раёна дасягаюць высокіх вынікаў па вытворчасці мяса, малака, збожжавых і зернебабовых культур.

“Толькі сваёй самаадданай працай мы можам зрабіць усё магчымае, каб наш раён, наша Беларусь захоўвалі дынаміку паступовага руху наперад”, – падкрэсліў старшыня райвыканкама.

Адзін з галоўных момантаў мерапрыемства – узняцце сцяга Рэспублікі Беларусь. Ганаровае права падняць яго было прадастаўлена старшыні раёнага савета ветэранаў Пятру Брузгіну і вучням сярэдняй школы в. Чэрні – пераможцам рэспубліканскай алімпіяды Анастасіі Баран і Пятру Янчуку. Пад гукі Дзяржаўнага гімна чырвона-зялёнае палотнішча сцяга, упрыгожанае белым арнаментам, калышучыся на паветры, паднялося над галовамі прыбужцаў.

Сонечнае надвор’е, якое усталявалася пад час раённага мерапрыемства, спрыяла святочнаму настрою яго ўдзельнікаў. А беларускія песні і родная мова, што гучалі са сцэны, напаўнялі сэрца пачуццём гонару і любові да сваёй Радзімы, такой прыгожай і непаўторнай, а галоўнае – адзінай для нас, беларусаў.

Вакальным майстэрствам гледачоў парадавалі Ганна Прыходзька, Вікторыя Гамзюк, Арына Жабацінская, Ганна і Марыя Цітовіч, Вольга Варганава, а таксама народныя ансамблі песні “Чарнічанка” і “Славія”. Выступ спевакоў стал яркім відовішчам дзякуючы танцавальным пастаноўкам у выкананні юных удзельнікаў гуртка “Ладушкі” РДК і харэаграфічнага аддзялення Матыкальскай дзіцячай школы мастацтваў.

Алеся ПАШКЕВІЧ

Фота аўтара

 

Похожие новости

Create Account



Log In Your Account



Заказать звонок
+
Жду звонка!