У праваслаўных – Вялікі пост | Заря над Бугом

У праваслаўных – Вялікі пост

З панядзелка гэтага тыдня ў праваслаўных вернікаў пачаўся Вялікі пост.

Ён папярэднічае цэнтральнаму святу царкоўнага календара – Светламу Хрыстову Уваскрасенню (Вялікадню). Гэта найважнейшы са шматдзённых пастоў Праваслаўнай царквы. Ён найбольш доўгі і строгі, доўжыцца сем тыдняў і нагадвае нам пра саракадзённы пост Збаўцы ў пустэльні.

Працягласць Вялікага посту заўжды аднолькавая, але яго пачатак і канец прымяркоўваюцца да канкрэтнага дня календара.

Увесь гэты перыяд вернікі рыхтуюцца да сустрэчы Вялікадня. У першы тыдзень з панядзелка па чацвер на вячэрніх службах у цэрквах па частках чытаецца Вялікі пакаянны канон Андрэя Крытскага – найбольш доўгі з існуючых канонаў.

Кожны тыдзень Вялікага посту мае сваё прысвячэнне. Напрыклад, трэці – крыжапаклонны, а на пяты прыпадае ўспамін пра Марыю Егіпецкую, якая правяла 47 год у пустэльні ў адзіноце, посце і пакаянні і лічыцца адным з узораў пакаяння.

У час Вялікага посту змяняецца парадак богаслужэнняў. У прыватнасці, не служыцца літургія па панядзелках, аўторках і чацвяргах, калі на гэтыя дні не прыпадаюць святы.

Любы пост, вяома, гэта абмежаванне ў ежы, аднак не толькі ў ёй адной. Для верніка не менш важна ўдзяляць час чытанню Святога Пісання і ўдзельнічаць у таінстве Еўхарыстыі (Прычасця).

Гэта час строгага ўстрымання, падрыхтоўкі хрысціян да годнай сустрэчы Вялікадня.

У Вялікі пост забаронена ўжыванне ежы жывёльнага паходжання – мяса, малочных прадуктаў, а таксама птушкі, яек, рыбы. Рыба на стале дазваляецца толькі двойчы – на Благавешчанне і ў Вербную нядзелю.

Але ёсць выключэнні: пост палягчаецца для хворых, людзей сталага веку, цяжарных жанчын, а таксама людзей цяжкай фізічнай працы.

Абмежаванне ў ежы, адмова ад удзелу ў разнастайных забаўляльных мерапрыемствах у гэты час – сімвал смутку і пакаяння. Глыбінная сутнасць посту – маральнае ўзвышэнне верніка, ачышчэнне душы, любоў, міласэрнасць і спагада. Без усяго гэтага пост можа стаць усяго толькі дыетай.

Дзмітрый ПІСКУР

Похожие новости

Create Account



Log In Your Account



Заказать звонок
+
Жду звонка!